கடவுள் யார்?

ஆணல்லன் பெண்ணல்லன் அல்லா அலியுமல்லன்
காணலும் ஆகான் உளனல்லன் இல்லையல்லன்
பேணுங்கால் பேணும் உருவாகும் அல்லனுமாம்
கோணை பெரிதுடைத்தெம் பெம்மானைக் கூறுதலே.
(நம்மாழ்வார் திருவாய்மொழி)

ஆணுமில்லை, பெண்ணுமில்லை, அலியுமில்லை.
காட்சிக்கு எட்டாதவன். இருப்பவன் என்றோ, இல்லாதவன் என்றோ சொல்ல முடியாது. நினைப்பவன் நினைக்கும் உருவமெல்லாம் அவனுருவம்.
ஆனாலும் எவ்வுருவமும் அவனுருவமன்று!.

இவ்வளவு கடினமான பொருள் மானிடரின் அன்புக்கு கட்டுபட்டது என்பது தான் வியப்பிலும் வியப்பன்றோ!. அபிராமி அந்தாதியில் பட்டர்பிரான் சொல்கிறார் "மொழிக்கும் நினைவிற்கும் எட்டாத உன் திருமூர்த்தி என் விழிக்கும் வினைக்கும் எட்டியது". உண்மையில் கடவுளை அடைய முடியும் என்னும் நம்பிக்கையை நமக்கு அளிக்கவே அடியார்கள் தங்கள் அனுபவங்களை பாடல்களாக வடிக்கின்றனர். தன் வீட்டிற்கு வ்ழி மறந்த ஒருவன், ஏற்கனவே வழி தெரிந்தவர்களிடம் தடம் கேட்டு செல்வது போல நாம் நமதியல்பை சான்றோர் உதவியால் அடைவோமாக!